“Xoş gəldin, Ramazan” Şəhid Analarına həsr olunmuş mənalı tədbir

14 mart 2026-cı il tarixində vətənpərvər insan Kifayət Bayramova tərəfindən şəhid anaları üçün xüsusi əhəmiyyət daşıyan “Xoş gəldin, Ramazan” adlı tədbir təşkil olundu. Müqəddəs Ramazan ayının gəlişi münasibətilə keçirilən bu tədbir həm şəhid ailələrinə ehtiramın ifadəsi, həm də milli-mənəvi dəyərlərimizin yaşadılması baxımından böyük məna daşıyırdı.
Tədbirdə şəhid anaları, qazilər və vətənpərvər insanlar iştirak edirdilər. Səmimi və duyğulu mühitdə keçirilən görüşün əsas məqsədi müqəddəs Ramazan ayı ərəfəsində şəhid ailələrinə mənəvi dəstək olmaq, onların yanında olunduğunu bir daha göstərmək idi.Tədbir Azərbaycan torpaqlarının azadlığı uğrunda canlarını fəda etmiş bütün şəhidlərimizin əziz xatirəsinin ehtiramla yad olunması ilə başladı. İlk olaraq şəhidlərin ruhu bir dəqiqəlik sükutla anıldı. Daha sonra onların müqəddəs ruhlarına dualar oxundu,ehsanlar . Bu anlar tədbir iştirakçılarında həm qürur, həm də kövrək duyğular yaratdı.
Çıxış edənlər şəhid analarının göstərdiyi səbrdən və mərdlikdən danışaraq onların xalqımız üçün böyük mənəvi dayaq olduqlarını qeyd etdilər. Bildirildi ki, şəhid anaları Vətənə qəhrəman oğullar bəxş etmiş müqəddəs analardır və onların qarşısında hər zaman baş əyilir.Tədbirin təşkilatçısı Kifayət Bayramova çıxışında Ramazan ayının mərhəmət, paylaşmaq və birlik ayı olduğunu vurğuladı. O qeyd etdi ki, şəhid ailələrinə diqqət və qayğı göstərmək hər bir vətənpərvər insanın borcudur. O, tədbirə qatılan şəhid analarına minnətdarlığını bildirərək onların qarşısında böyük hörmət hissi keçirdiyini ifadə etdi.
Tədbir zamanı şəhidlərin qəhrəmanlıqlarından danışıldı, onların xatirələri yad edildi. Analərin dilindən səslənən xatirələr tədbir iştirakçılarını kövrəltdi və hər kəsə bir daha xatırlatdı ki, bu torpağın azadlığı böyük qəhrəmanlıq və fədakarlıq hesabına qazanılıb.
Tədbirin sonunda Kifayət Bayramova tərəfindən gələn qonaqlara və şəhid analarına Ramazan bayramı münasibətilə hədiyyələr təqdim olundu. Bu hədiyyələr tədbir iştirakçıları tərəfindən böyük minnətdarlıq və sevgi ilə qarşılandı.“Xoş gəldin, Ramazan” adlı bu tədbir şəhid ailələrinə göstərilən diqqət və ehtiramın gözəl nümunəsi oldu. Belə tədbirlər xalqımızın şəhidlərə və onların ailələrinə olan sonsuz hörmətinin ifadəsi kimi hər zaman böyük dəyər daşıyır.
Raziyə KamilqızıAYB və AJB- nin üzvü