Ərəb mediası Misir-Azərbaycan Dostluq Cəmiyyəti və ərəb ölkələrində Azərbaycan icmasının bəyanatını yayıb
Baxılıb: 671 Tarix: 17-04-2023 19:39
Misir, Səudiyyə Ərəbistanı, Əlcəzair, İordaniya, Suriya, Mərakeş, İraq və Sudan mətbuatında Ermənistan tərəfindən əsir götürülmüş Azərbaycan hərbçilərinə işgəncə verilməsi ilə bağlı Misir-Azərbaycan Dostluq Cəmiyyəti və Misirdə Azərbaycan diasporunun sədri, tədqiqatçı-alim Seymur Nəsirovun ərəb ölkələrindəki Azərbaycan icmasının adından bəyanatı yayılıb.Misir-Azərbaycan Dostluq Cəmiyyətindən zefertv.az-a bildiriblər ki, “Əl Hərir”, “Qarbnews”, “Nayrouz”, “Journalalasvat”, “Sama-Atlantis”, “”Rayetmısr” və s. qəzet və portallarda dərc olunmuş bəyanatda Azərbaycan ordusunun əsgərləri – 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlunun Ermənistana əsir düşməsi səbəblərinə aydınlıq gətirilib və onlara qarşı qeyri-insani rəftar ərəb oxucuların diqqətinə çatdırılıb.
Bəyanatda vurğulanıb ki, ərəb ölkələrində yaşayan soydaşlarımız Ermənistanın davranışını qətiyyətlə pisləyir, bu təcavüzkar ölkənin mühüm beynəlxalq aktları, o cümlədən Cenevrə Konvensiyasını, işgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyalar üzrə öhdəliklərini yerinə yetirmədiyini bəyan edirlər.
Müvafiq beynəlxalq təşkilatlardan həmin zorakılıq faktının araşdırması, lazımi hüquqi qiymət verilməsi, Azərbaycan hərbçilərinin dərhal və qeyd-şərtsiz azad edilməsi tələb olunub.
