Emil Əhmədov: "Yaxın günlərdə şaxtaların qazıntısı başlanacaq"
Baxılıb: 23 Tarix: 29-08-2025 15:55
"Bakı Metropoliteni" QSC-nin sədrinin müşaviri Emil Əhmədov, yeni stansiyaların inşası ilə bağlı işlərin mərhələli şəkildə davam etdiyini bildirib. Onun sözlərinə görə, "Yüksel Proje" şirkəti ilə 10 stansiyadan 9-nun və tunellərin layihələndirilməsi, həmçinin Yaşıl və Qırmızı xətlərin ayrılması üçün müqavilə imzalanıb.
Zefertv.az Məhəmməd Osmanov
Əhmədov əlavə edib ki, xətlərin ayrılması işlərinə "Dərnəgül" deposunda başlanılıb. Hazırda bu ərazidə tunellərdə 1 km-dən çox dəmir yolu çəkilişi sürətlə davam edir. Yollar dəmir-beton bloklar üzərində salınır. Həmçinin, depo ərazisində qatarların təmiri və baxımı üçün dəmir-beton işləri görülür və birinci mərhələdə 7 belə sahə istifadəyə veriləcək.
Yaxın günlərdə 30 metr dərinliyində şaxtaların qazıntısına başlanılacağını deyən Əhmədov, "Dərnəgül" deposunun ilk mərhələsi başa çatdıqdan sonra bu şaxtalardan istifadə edərək 200 metrə qədər tunel inşasına başlanılacağını qeyd edib.
Bundan başqa, "28 May" və "Cəfər Cabbarlı" stansiyalarını birləşdirəcək piyada tunelinin də layihə işləri tamamlanıb və hazırlıqlara başlanılıb. Müvafiq vaxtda bu layihənin də tikintisinə start veriləcək.
Layihə çərçivəsində, xətlər ayrıldıqdan sonra dayanıqlı enerji təminatını təmin edəcək iki elektrik yarımstansiyasının da layihələndirməsi davam edir. Eyni zamanda, "İçərişəhər" stansiyasının arxasındakı dönmə kamerası, dönmə tuneli və yeraltı avtomobil dayanacağının layihələndirilməsi üçün geoloji kəşfiyyat-axtarış işləri aparılır.
